Ayaw ko nang pakinggan kung ano pa yung sasabihin niya. Gusto ko na lang takpan iyong mga tenga ko para hindi na ako makarinig ng kahit ano tungkol pa sa kanya. Ano pa ba iyong hindi ko naiintindihan? Niloko niya ako. May ibang babae siya. Bakit kailangan pang pagkwentuhan.
"Yan, halika dito dali. Pagkwentuhan natin si Nick," hila ni Bart. May pagkagago din talaga itong chismoso na ito. Ewan ko ba kung bakit kung sino iyong lalake, siya pa iyong mahilig mang-chismis.
"Teka sandali lang, may ginagawa ako e," sagot ni Yan. Merong siyang inaatupag sa iPhone niya, nakasalpak na naman ang headset sa tenga. Napatingin siya saken tapos ngumiti. Anong meron? "Bart, pre, wait lang tawagin ko lang iyong iba, wag ka muna magsisimula" dagdag niya. Hmm. Interesado din siya sa chismis. Parang di halata ah. Bahala nga siya.
Pag-akyat ko sa lobby, napaupo na lang ako sa malapit sa escalator. Hinihintay ko si Kris dumating. Kahit paano man lang sana may support ako kapag ako iyong topic diba. Nakita kong bumalik si Yan kasama iyong dalawa niyang kaibigan. Nagsindi ng yosi iyong isa sabay akbay dun sa kasama niyang babae. Kinilabutan ako. Di ko akalaing may ganito siyang mga kaibigan. Dumating si Kris kasabay nung isa naming classmate. Kumaway siya saken at umupo sa tabi ni Bart. Sinimulan ni Bart ang kwento.
"Guys biruin niyo, nagawa pang lokohin ni Nick si Fibz," sabay turo saken. Kailangan ba talagang ipamukha mo saken yan Bart? Alam ko naman na niloko ako e. Kahit bali-baliktarin ata natin ang mga pangyayari wala nang magbabago. Pinagpalit ako sa babaeng nakilala niya sa club. Sa babaeng inofferan siya...
".. ng Cuervo. Inofferan lang si Nick ng Cuervo. Two shots lang iyon, naka-score agad si gago," dagdag ni Bart sabay shot ng JB sa harap niya. Kwinento pa niya kung saan nagpunta si Nick at iyong babae after nung party, tapos iyong mga nangyari pang kasunod. Hindi ko na marinig kung ano pang detalye ang alam niya, ang alam ko na lang, nanghihina na ako. Nanlalambot. Kahit sino, please hawakan niyo ako. Feeling ko para akong nauupos na kandila. Naiiyak na ako. May karapatan naman akong umiyak diba? Ang sakit na.
Nagising iyong diwa ko nang lumapit si Yan saken. Dali-dali pa siyang pumwesto sa tabi ko. Hindi ko alam kung bakit. Hinawakan niya iyong kamay ko. Malakas ba iyong pagkakasabi ko na kailangan ko nang hahawak saken? Feeling ko naman sa sarili ko lang iyon. Pero hindi ako pwedeng magkamali. Hinawakan ni Yan iyong kamay ko.. nang mahigpit. Na parang inaassure niya sa akin na okay lang ang lahat. Na makakakaya ko din. Napatingin ako sa kanya; gusto ko din sana siyang tanungin kung alam ba niya iyong ginagawa niya. Kaso nang gawin ko iyon, nakatingin siya kay Bart, nakikinig.